Vuõiggâdvuõttkanslerkonttâr äʹššvaaldšemriâžldõk Vahva
Vuõiggâdvuõttkanslerkonttâr äʹššvaaldšemriâžldõk Vahvaaʹje ruõkkât äʹššǩiõttʼtõõllmõõžž oudldem teâđaid, mieʹldd looǥǥeeʹl äšša õhttneei persoonteâđaid, vuõiggâdvuõttkanslerkonttra liâđǥlânji tååimtum äʹššǩiõttʼtõõllmõʹšše õhttneei äʹššǩiiʹrjid da teâđ põʹmmaihääʹmest puättam äʹššǩiiʹrjin di vuõiggâdvuõttkanslerkonttrest rajjum äʹššǩiiʹrjid.
Rekistertuõʹllʼjeei
Vuõiggâdvuõttkanslerkoontâr
Jååʹttemaddrõs Snellmaninkatu 1, HEʹLSSEN
Pååʹštaddrõs PL 20, 00023 RIIKKSUÅVTÕS
Teʹlfon 0295 162 902 (rekisterâʹsttemkoontâr)
Neʹttpååʹšt kirjaamo.okv(at)gov.fi
Teâttsuejjvaʹstteei
Pekka Liesivuori
Pååʹštaddrõs PL 20, 00023 RIIKKSUÅVTÕS
Neʹttpååʹšt tietosuojavastaava.okv(at)gov.fi
Persoonteâđai ǩiõttʼtõõllmõõžž meäʹr di ǩiõttʼtõõllmõõžž lääʹǩǩvuâđđ
Persoonteâđaid ǩiõttʼtõõlât vuõiggâdvuõttkansleeʹr lääʹjjest šiõttuum lääǥǥlažvuõttvuåppâmtuâj spraavâm diõtt da vuõiggâdvuõttkanslerkonttra kuulli tuâjjuʹvddi- da veʹrǧǧneǩtuâjai tieuʹddem diõtt.
Ǩiõttʼtõõllmõõžž lääʹǩǩvuâđđan lij takai teâttsuejjasetõõzz 6 artikla 1 pääiʹǩ c-vueʹllpäiʹǩǩ da vueiʹtlvaž äʹššǩeʹrjjaunstõʹsse siskkneei jeäʹrab persoonteâttjooukid kuulli teâđaid vueʹzzeld takai teâttsuejjasetõõzz 9 artikla 2 pääiʹǩ g-vueʹllpäiʹǩǩ.
Ǩiõttʼtõõllâmvuâllsa persoonteâđ
Äʹššvaaldšemriâžldõõǥǥâst ǩiõttʼtõõlât vuõiggâdvuõttkanslerkonttrest ǩiõttʼtõõllâmvuâllsaž aaʹššid da äʹššǩiiʹrjid õhttneei nõmm- da õhttvuõtt-teâđaid di ääʹšš da äʹššǩiiʹrji jeärtõõllâm- da ǩiõttʼtõõllâmteâđaid. Vuõiggâdvuõttkanslerkonttra tååimtum da äʹššvaaldšemriâžldõʹǩǩe ruõkkum äʹššǩeeʹrj vuäiʹtte ââʹnned seʹst mâid persoonteâđaid täättas.
Persoonteâđai vuâsttavaʹlddi da leʹbe vuâsttavaʹlddijoouk
Vuõiggâdvuõttkanslerkonttâr tuâjjlažkåʹdd ǩiõttʼtââll persoonteâđaid veʹrǧǧtuâjaineez. Iʹlmmteeisuõjjlemaaʹššin persoonteâđaid vuäiʹtte ǩiõttʼtõõllâd tåʹlǩ iʹlmmteeisuõjjlemlääʹjj juʹrddem naaʹlin tuõjju nõõmtum oummu. Lââʹssen eeʹttiǩ-kååʹdd vuõiggâdvuõttäʹššoummu kanslia rekisterâʹsttemkonttrest lij riikksuåvtõõzz vuõiggâdvuõttkansleeʹr da eeʹttiǩ-kååʹdd vuõiggâdvuõttäʹššoummu tuâjai juâǥǥast uvddum lääʹjj tieuʹddem diõtt piâssmõš äʹššvaaldšemriâžldõõǥǥ teâđaid äʹššǩeʹrjjaunstõõzz da iʹlmmteeisuõjjlemlääʹjj juʹrddem iʹlmmtõõzzid kuõskki aaʹššid lokku vääʹldǩani.
Äʹššvaaldšemriâžldõõǥǥ teâđaid jeät sirddu kuälmad riikkid leʹbe meeraikõskksaž organisaatioid.
Persoonteâđai seeiltemäiʹǧǧ
Ääʹšš tuʹmmjem vuâlla piijji nõõm da õhttvuõtt-teâđaid da ääʹšš ǩiõttʼtõõllâmteâđaid lââʹzztum vueʹsspieʹli nõmm- da õhttvuõtt-teâđaid seeiltet põõššinalla. Iʹlmmteeisuõjjlemlääʹjj meâldlaž iʹlmmtõõzzi ǩiõttʼtõõllâm vuâlla piijji kuõskki teâđaid da iʹlmmtõõzzi vuâlla šõddâm oummu kuõskki teâđaid jeät pijju persoonteâđaid, koid seeiltet.
Äʹššǩiiʹrjid õhttneei persoonteâđaid da liâđǥlaž äʹššvaaldšemriâžldõʹǩǩe ruõkkum äʹššǩiiʹrjid seeiltet vuõiggâdvuõttkanslerkonttâr teâttohjjeemplaanâst meäʹrtõllum ääiʹj.
Rekisterõsttum oummu vuõiggâdvuõđ
Rekisterõsttum oummust lij vuõiggâdvuõtt vuäǯǯad teâđ tõʹst, što suu kuõskki persoonteâđaid ǩiõttʼtõõlât leʹbe što tõid jeät ǩiõttʼtõllu, da jõs täid persoonteâđaid ǩiõttʼtõõlât, vuõiggâdvuõtt vuäǯǯad piâssmõõžž persoonteâđaid.
Rekisterõsttum oummust lij vuõiggâdvuõtt kaiʹbbjed rekisterõsttum oummu kuõskki panntääʹrǩes da vââǥǥlaž persoonteâđai vuõiǥummuž da, vääʹldeeʹl lokku teâđai ǩiõttʼtõõllmõõžž meäʹr, vuõiggâdvuõtt vuäǯǯad vännas persoonteâđaid tiudduum.
Rekisterõsttum ooumaž vuäitt raukkâd, što rekistertuõʹllʼjeei rääʹjat ǩiõttʼtõõllmõõžž, jõs rekisterõsttum ooumaž lij šeäggam persoonteâđai tuõʹllʼjummuž. Teʹl persoonteâđai ǩiõttʼtõõllmõõžž rääʹjtet ääiǥas, koon seʹst rekistertuõʹllʼjeei vuäitt ainsmâʹtted tõi tuõʹllʼjummuž.
Rekisterõsttum oummu vuõiggâdvuõđ ǩiõttʼtõõllmõõžž rääʹjtummša jeät suåvlduku iʹlmmteeisuõjjlemaaʹššid da rekisterõsttum oummu piâssmõõžž teâđaid vueiʹtet rääʹjted, jõs tõt lij vieʹltʼtem da toolkâv iʹlmmtõõzz tuõʹllʼjummuž seʹlvvtummuž staaneem diõtt leʹbe iʹlmmteei identiteeʹtt suejjeem diõtt. Jõs tåʹlǩ vueʹss teâđain lie nåkam, što tõk päʹcce piâssâmvuõiggâdvuõđ åålǥpeälla, rekisterõsttum oummust lij vuõiggâdvuõtt vuäǯǯad tieʹtted jeeʹres suu kuõskki teâđaid. Rekisterõsttum oummust lij vuõiggâdvuõtt vuäǯǯad teâttses rääʹjtõõzz määinaid da raukkâd teâđai ouddmõõžž teâttsuejjväʹlddnekka teâttsuejjlääʹjj (1050/2018) 34 § 3 da 4 momeeʹnt meâldlânji.
Persoonteâđaid kuõskki teâttraukkmõõžž da persoonteâđai vuõiǥummuž leʹbe tiuddummuž di ǩiõttʼtõõllmõõžž rääʹjtummuž kuõskki raukkmõõžžid âlgg čuäʹjted rekistertuõʹllʼjeeja.