Almmolaš áššit guoddaleami ja dan dahkama birra
-
Guoddaleapmi lea girjjálaččat vuoigatvuođakánslerii dahkkon almmuhus dahje doaibmabivdda. Guoddaleamis muitaluvvo eiseválddi, virgeolbmo dahje eará doaibmi, guhte dikšu almmolaš barggu, doaimmas, man guoddaleaddji doallá lágaheapmin.
Guoddalemiin ii sáhte ohcat nuppástusa dahkkon mearrádussii. Guoddaleapmi lea doaibma, mii sáhttá bidjat johtui vuoigatvuođakánslera bearráigeahču doaibmabijuid.
-
Guoddaleami sáhttá čállit ieš friijahápmásaččat. Juristta veahki ii dárbbaš geavahit.
Loga rávvagiid ovdal guoddaleami dahkama.
-
Guoddaleami galgá čállit čielga ja áššálaš gillii.
Guoddaleamis galgá muitalit čielgasit ja oanehaččat, guđemuš eiseváldi dahje eará doaibmi, guhte dikšu almmolaš barggu, lea doaibman lága vuostá. Dasa lassin galgá muitalit, mo ja goas lágavuostásaš doaibma lea dáhpáhuvvan ja manin doaibma lea leamašan lága vuostá. Guoddaleapmái laktojuvvon vejolaš mildosat dievasmahttet ja čielggadahttet guoddaleami. Dušše mildosiidda čujuheapmi ii reahkká. Oaivilčálus ii gieđahallojuvvo guoddaleapmin.
Ovdamearkan čuovvovaš guoddalanteaksta ii reahkká iige leat heivvolaš: “Dát ášši galgá čielggaduvvot! Lohkket x:a doaimmas ođđasa, mii lea mielddusin.”
Loga rávvagiid ovdal guoddaleami dahkama.
-
Guoddaleami sáhttá čállit gieđain. Dan galgá goittotge čállit nu čielga čáláldagain, ahte dan lea vejolaš lohkat.
-
Guoddaleami dutkan lea guoddaleaddjái nuvttá.
-
Guoddaleapmái vuodjuma álkidahttá, jus dan mielde doaimmahuvvojit dehálamos áššái laktáseaddji áššegirjjit. Dákkár áššegirjjit sáhttet leat ovdamearkan
- duopmostuolu dahje eará eiseválddi mearrádus áššis
- eseválddis ožžojuvvon vástádus diđoštallamii
- eiseváldái sáddejuvvon ohcamuš dahje diđoštallan, masa ii leat ožžon vástádusa.
Nuppi olbmo beales guoddalettiin lea buorre laktit váldegirjji mielde.
-
Guoddalanáššái addojuvvo áššiidhálddašanvuogádagas áššedovddaldat nappo diáranummir, mii spesifisere ášši. Maiddái guoddaleapmái laktojuvvon mearrádusain ja áššegirjjiin lea dábálaččat diáranummir.
-
Vuoigatvuođakánsleradoaimmahat bálvala áššehasaidis suomagillii ja ruoŧagillii. Guoddaleami sáhttá čállit maiddái sámegillii.
Maiddái eaŋgalasgillii čállojuvvon guoddalemiid geahččalit gieđahallat. Guoddalanmearrádus ja dasa laktáseaddji materiála ii jorgaluvvo eaŋgalasgillii.
-
Guoddalanriekti ii leat gitta riikavulošvuođas.
-
Namahis guoddalančálus ii dábálaččat dutkojuvvo. Jus namahis guoddalančálus sisttisdoallá maid nu dakkára, mii eaktuda ášši dutkama, ášši sáhttá dutkojuvvot sierra álggan vuoigatvuođakánsleradoaimmahagas. Dalle dábálaččat eaktuduvvo, ahte ášši dutkan nanusmahttá almmolaš ovddu.
-
Guoddaleami gieđahaladettiin čuvvojuvvo láhka eiseválddi doaimma almmolašvuođas. Dábálaččat guoddaleamit leat almmolaš áššegirjjit.
Guoddalančállosa lea vejolaš addit ovdamearkan doaimmaheaddjái, jus dat ii sisttisdoala dieđu, man galgá gieđahallat suollemassan, iige ášši birra muitaleapmi heađuš ášši dutkama. Lága mielde dieđut, maid galgá doallat suollemassan, leat ovdamearkan dakkár dieđut mat gusket guoddaleaddji dearvvasvuođadillái dahje sosiálaovdduide. Guoddaleapmi lea eará osiin almmolaš maŋimustá dalle, go guoddalanáššis lea addojuvvon mearrádus.
Guoddaleaddji namma boahtá su dihtui, geasa guoddaleapmi gusto, jus su gullet guoddaleami geažil. Guoddaleaddji namma sáhttá dollojuvvot suollemassan, jus dieđu addin uhkidivččii lágalašvuođagohcima doaibmavejolašvuođaid. Guoddaleaddji namma sáhttá čihkkojuvvot sierra dáhpáhusa árvvoštallama vuođul maiddái sus, geasa guoddaleapmi čuohcá, jus hui dehálaš almmolaš dahje priváhta ovdu dan gáibida.
Ovdal ášši mearrideami guoddalanáššegirjjiid almmolašvuohta árvvoštallojuvvo sierra juohke dáhpáhusa oktavuođas. Neahttasiidduin mearrádusat almmustahttojit nuppástuhtton hámis nu, ahte guoddaleaddji ja dárbbu mielde guoddaleami čuozáhaga ii sáhte šat dovdát mearrádusas.
-
Guoddaleami gieđahallama guhkodat lea gitta ášši luonddus. Guoddalanáššiid gieđahallanáigemearri lea eanemustá okta jahki. Jus ášši, mii lea guoddaleami čuozáhahkan, ii gula vuoigatvuođakánslera doaibmaváldái, ášši čovdojuvvo nu johtilit go vejolaš.
-
Guoddaleami gieđahallanmuttu sáhttá gulaskuddat vuoigatvuođakánsleradoaimmahaga registrerenkantuvrras, [email protected].
-
Guoddaleami sáhttá geassit ruovttoluotta girjjálaččat, njálmmálaš almmuhus telefovnna bokte ii reahkká. Jus guoddaleami gieđahallan mearriduvvo loahpaduvvot, dan birra almmuhuvvo guoddaleaddjái.
-
Sáddejuvvon guoddaleami sáhttá dievasmahttit lassečállosiin. Vejolaš lassečállosiid galgá doaimmahit vuoigatvuođakánsleradoaimmahaga registrerenkantuvrii.
Iešguđetlágan guoddalanáššit ja vuoigatvuođakánslera doaibmaváldi
-
Vuoigatvuođakánsler ii dutkka badjel guokte jagi boares ášši almmá erenomáš siva haga.
-
Vuoigatvuođakánslerii ja riikkabeivviid vuoigatvuođaáššeolbmui leat biddjon sierranas spesiálabarggut. Guoddaleami dehege váidalusa galgá bargat dan lágalašvuođagohccái, gean bargguide ášši gullá.
Vuoigatvuođakánsler sirdá vuoigatvuođaáššeolbmo gieđahallamii gullevaš áššiid vuoigatvuođaáššeolbmui. Vuoigatvuođaáššeolmmoš doaibmá seamma láhkai vuoigatvuođakánslerii gullevaš áššiid buohta. Sirdimis almmuhuvvo váidaleaddjái. Guoddaleami dutkamis ja čoavdimis mearrida dat lágalašvuođagohcci, geasa ášši lea sirdon.
Loga vuoigatvuođakánslera ja vuoigatvuođaáššeolbmo bargguid erohusain.
-
Ii sáhte. Vuoigatvuođakánsler ja vuoigatvuođaáššeolmmoš eaba dutkka seammá ášši seamma áigge.
-
Lágalašvuođagohccit eaba bearrái geahča nuppiideaskka doaimma. Vuoigatvuođakánsler ii almmá erenomáš siva dutkagoađe ášši, man vuoigatvuođaáššeolmmoš lea jo čoavdán.
-
Vuoigatvuođakánsler ii leat nuppástusohcaneiseváldi. Vuoigatvuođakánslerii čujuhuvvon guoddaleapmi ii leat molssaevttolaš meannudeapmi nuppástusohcamii. Vuoigatvuođakánsler ii sáhte nuppástuhttit dahje gomihit duopmostuolu dahje eará eiseválddi mearrádusa. Jus guoddaleaddji háliida nuppástusa gárvves mearrádussii, son galgá váidalit mearrádusas das addojuvvon nuppástusohcanrávvagiid mielde.
-
Vuoigatvuođakánsler ii álgge gieđahallat dakkár ášši, man mearrádussii sáhttá ohcat nuppástusa njuolggaduslaš nuppástusohcanvugiiguin (nuppástusohcanáigi lea vel jođus). Nuppástusohcamis čuvvojuvvojit mearrádusa addán eiseválddi nuppástusohcanrávvagat.
-
Ii sáhte. Vuoigatvuođakánsler ii gieđahala ođđasit ášši, man veahkkevuoigatvuođakánsler lea čoavdán. Vuoigatvuođakánsleris, veahkkevuoigatvuođakánsleris ja veahkkevuoigatvuođakánslera sadjásaččas lea seamma váldi čoavdit sin bargui gullevaš áššiid iige sin doaibmaváldái gula nuppiid mearrádusaid árvvoštallan.
Geavadis veahkkevuoigatvuođakánsler čoavdá stuorámus oasi guoddalemiin. Veahkkevuoigatvuođakánsler čoavdá iešráđálaččat sutnje gullevaš áššiid.
-
Vuoigatvuođakánslera bargui ii gula juridihkalaš rávvagiid addin priváhta olbmuide. Dákkár rávvagiid dárbbašettiin priváhta olbmot sáhttet ohcat veahki riekteveahkkedoaimmahagas, ášševuoddjis dahje eará láhkaolbmos. Vuoigatvuođakánsler ii atte juridihkalaš cealkámušaid priváhta olbmuide. Vuoigatvuođakánsler ii doaimma priváhta olbmuid áššeolmmožin dahje ovdogohccin.
-
Vuoigatvuođakánsler ii dábálaččat gieđahala ášši, man doaibmaválddálaš eiseváldi lea gieđahallamin.
-
Vuoigatvuođakánsleris ii leat doaibmaváldi váikkuhit dakkár lágaid sisdoaluide, maid riikkabeaivvit leat dohkkehan.
Vuoigatvuođakánsler gohcá lágaválmmaštallama ovddalgihtii. Lágaválmmaštallama áigásaš njuolggadusgohcima ulbmilin lea fuolahit das, ahte evttohusain, mat bohtet stáhtaráđi mearrideapmái, ii livčče mihkkige fuomášahttin lágalašvuođabearráigeahču geahččanguovllus.
-
Vuoigatvuođakánslera bargui ii gula dieđuid sirdin priváhta álbmotlahtuid ja eiseválddiid gaskka. Áššiid gieđahallamii laktáseaddji gažaldagaid galggašii čielggadit njuolga eiseválddiin.
Vuoigatvuođakánsler ii maiddái sirdde guoddaleddjiid bivdagis áššegirjjiid eará eiseválddiide, muhto guoddaleaddji galgá doaimmahit daid ieš dan eiseváldái geasa háliida.
-
Vuoigatvuođakánsleris ii leat doaibmaváldi váikkuhit ovttaskas ášševuoddji, almmolaš vuoigatvuođaveahki dahje lobi ožžon diggeveahki doibmii dahje mearridit sutnje ráŋgunráŋggáštusa. Dát doaibmaváldi lea bearráigeahččanlávdegottis, mii doaibmá Suoma Ášševuoddjiidlihtu oktavuođas.
Ovttaskas ášševuoddjiid, almmolaš vuoigatvuođavehkiid ja lobi ožžon diggevehkiid doaimmas sáhttá guoddalit bearráigeahččanlávdegoddái, mii doaibmá
Suoma Ášševuoddjiidlihtu oktavuođas. -
Vuoigatvuođakánsler ii seahkan áššái, man duopmostuollu gieđahallá. Vuoigatvuođakánsler ii maiddái sáhte gaskkalduhttit dikki dahje mearridit, ahte duopmár, guhte gieđahallá ášši, galgá molsojuvvot.
Guoddalanášši čielggadeapmi ja mearrádusa válmmastallan
-
Vuoigatvuođakánsleradoaimmahaga juristaovdanbukti čielggada guoddalanášši ja dahká mearrádusevttohusa. Guoddaleami čoavdá vuoigatvuođakánsler, veahkkevuoigatvuođakánsler dahje veahkkevuoigatvuođakánslera sadjásaš. Buot mearrideaddjiin lea seamma váldi čoavdit bargguide gullevaš guoddalemiid.
-
Áššegirjjiid ja dieđuid háhkan
Guoddalanášši čielggadeami várás eiseválddis / virgeolbmos sáhttit háhkat áššegirjjiid ja dieđuid, mat gustojit guoddalanáššái.
Čielggadanbivdda
Guoddalanášši čielggadeapmin eiseváldái dahje virgeolbmui sáhttá sáddejuvvot čielggadanbivdda. Čielggadeamis eiseváldi ovdanbuktá oainnu iežas meannudeamis.
Čielggadusa sáhttá bivdit juogo njuolga guoskevaš eiseválddis / virgeolbmos dahje alit eiseválddis.
Čielggadanbivdagis ásahuvvo mearreáigi, man siste čielggadusa galgá doaimmahit vuoigatvuođakánsleradoaimmahahkii.
Jus čielggadus lea váilevaš, eiseválddis sáhttet vel háhkat lassečielggadeami.
Cealkámušbivdda
Cealkámuš sisttisdoallá juridihkalaš árvvoštallama guoddaleami eiseválddi dahje virgeolbmo meannudeamis, masa guoddaleapmi guoská.
Cealkámuša sáhttá bivdit alit eiseválddis dahje eará eiseválddiin dahje áššedovdiin.
Ovdadutkamat
Guoddalanáššái sáhttá ohcat čielggadeami maiddái ovdadutkama vehkiin, man poles dahká. Ovdadutkama lea vejolaš dahkat, jus áššis sáhttá eahpidit rihkkosa.
-
Vuoigatvuođakánsleris lea riekti oažžut su dárbbašan dieđuid eiseválddiin ja dain, geat dikšot eará almmolaš doaimmaid, lágalašvuođabearráigeahču várás.
-
Guoddaleaddji sáhttá oažžut dilálašvuođa addit vástádusa, jus dat lea ášši gieđahallama dáfus dárbbašlaš. Vástádusas guoddaleaddji addá girjjálaš vástádusa ja ovdanbuktá iežas oainnu guoddalanáššis háhkkojuvvon čielggademiide ja cealkámušaide. Vástádusa addin lea eaktodáhtolaš. Guoddalanášši čovdojuvvo, vaikko vástádus ii addojuvvošiige.
Guoddaleami čoavdin
-
Guoddaleami čoavdá vuoigatvuođakánsler, veahkkevuoigatvuođakánsler dahje veahkkevuoigatvuođakánslera sadjásaš. Čoavdit čovdet iežaset bargguide gullevaš guoddalemiid iešráđálaččat eaige sii árvvoštala nuppiideaset mearrádusaid.
Loga vuoigatvuođakánslera ja veahkkevuoigatvuođakánslera bargojuogu birra.
-
Mearrádusas muitaluvvo, makkár čielggadeamit guoddaleami čoavdima várás leat háhkkojuvvon. Dasa lassin mearrádusas ákkastallojuvvo man vuođul mearrádus lea dahkkon.
Guoddaleamit čovdojuvvojit
- vuoigatvuođakánslera / veahkkevuoigatvuođakánslera mearrádusain
- vuoigatvuođakánslera / veahkkevuoigatvuođakánslera dahje vuoigatvuođakánsleradoaimmahaga ovdanbukti vástádusreivviin.
Guoddaleapmi čovdojuvvo mearrádusain, jus guoddaleamis bohtet čuovvumušat. Mearrádusain addojuvvon čovdosat sáhttet dagahit earret eará áššáskuhttima, fuomášuhttima, evttohusa dahkama dahje oaivila cealkima.
Guoddaleaddjái sáddejuvvo vástádusreivve, jus guoddaleamis eai boađe čuovvumušat.
-
Guoddaleaddjái ii sáddejuvvo mearrádus, jus
- guoddaleapmi lea oaivilčálus
- guoddaleapmi sisdoallá dušše diehtun sáddejuvvon kopiija áššegirjjis
- guoddaleapmi lea nu moivvás, ahte das ii oaččo čielgasa
- jeavddalaš guoddaleapmi geardduha ovddit guoddalemiid iige sisdoala maidige ođđa, ja guoddaleaddjái lea jo oktii almmuhuvvon, ahte dákkár čállosiidda ii šat vástiduvvo
- guoddaleapmi lea namaheapmi iige guoddaleami dutkamii iežas álggan leat vuođustus.
-
Ovdanbukti sáhttá okto vuolláičállit vástádusreivve, jus
- gažaldagas lea vástádus ovttaskas diđoštallamii
- guoddaleapmi guoská juo ovdal čovdojuvvon áššái, man doarjjan eai leat ovdanbukton ođđa ákkat
- vuoigatvuođakánsler dahje veahkkevuoigatvuođakánsler lea nu mearridan ovdamearkka dihtii dakkár ášši buohta, mas vástádus ii sisdoala juridihkalaš oainnu.
-
Ii sáhte.