Vuoigatvuođa­kánsler ja veahkkevuoigat­vuođakánsler

Vuoigatvuođakánsler gohcá, ahte stáhtaráđi ja presideantta sihke duopmostuoluid ja eará eiseválddiid doaibma čuovvu lága. Vuoigatvuođakánsleris leat maiddái ášševuoddjiid, almmolaš vuoigatvuođavehkiid ja diggevehkiid, geat leat ožžon lobi, bearráigehččui laktáseaddji barggut.

Stáhtaráđi vuoigatvuođakánsler lea sorjjasmeahttun, alimus lágalašvuođabearráigeahčči riikkabeivviid vuoigatvuođaáššeolbmo lassin. Vuoigatvuođakánslera nammada dásseválddi presideanta. Vuoigatvuođakánslera bargguid dikšot maiddái presideantta nammadan veahkkevuoigatvuođakánsler ja veahkkevuoigatvuođakánslera sadjásaš, gean presideanta lea mearridan. 

Vuoigatvuođakánsleris lea oktonassii mearridanváldi buot su virgái gullevaš áššiin. Veahkkevuoigatvuođakánsler ja vuoigatvuođakánslera sadjásaš čoavdiba sudno gieđahallamii gullevaš áššiid seamma válddiin go vuoigatvuođakánsler. Vuoigatvuođakánsler jođiha vuoigatvuođakánsleradoaimmahaga.

Vuoigatvuođakánsler čoavdá vuosttamužžan áššiid, mat gustojit

  • riikkabeivviide
  • dásseválddi presidentii
  • stáhtaráđđái ja dan lahtuide sihke ministeriijaide 
  • alimus eiseválddiide
  • vuoigatvuođakánslera­doaimmahahkii
  • riikkaidgaskasaš ovttasdoaibmamii ja riikkaidgaskasaš áššiide
  • Eurohpa uniovnna áššiid álbmotlaš válmmaštallamii
  • ášševuoddjiid bearráigehččui
  • vuoigatvuođakánslera cealkámušaide
  • prinsihpalaš dahje viidát váikkuheaddji gažaldagaide.

Veahkkevuoigatvuođakánsler čoavdá áššiid, mat eai dábálaččat gula vuoigatvuođakánslerii. Geavadis veahkkevuoigatvuođakánsler čoavdá stuorámus oasi guoddalemiin. Veahkkevuoigatvuođakánsler bearráigeahččá duopmostuoluid ja eará eiseválddiid doaimma lágalašvuođa earret eará guoddalemiid gieđahallamiin ja lágalašvuođabearráigeahču fitnamiid dahkamiin. Dasa lassin veahkkevuoigatvuođakánsler dárkkista stáhtaráđi beavdegirjjiid. Veahkkevuoigatvuođakánsler doaibmá maiddái vuoigatvuođakánslera sadjásažžan ja dalle su bargguid dikšu veahkkevuoigatvuođakánslera sadjásaš.

Vuoigatvuođakánslerin doaibmá riektediehtagiid doavttir Tuomas Pöysti ja veahkkevuoigatvuođakánslerin riektediehtagiid doavttir, várreduopmár Mikko Puumalainen. Veahkkevuoigatvuođakánslera sadjásažžan doaibmá riektediehtagiid lisensiáhta, várreduopmár Petri Martikainen.