Diehtu doaimmahaga birra

Vuoigatvuođakánsleradoaimmahaga bargun lea doarjut vuoigatvuođakánslera ja veahkkevuoigatvuođakánslera sudno doaimmain. Vuoigatvuođakánsleradoaimmahagas válmmaštallojit áššit mat gullet vuoigatvuođakánslera čoavdima vuollái ja dikšojuvvojit vuoigatvuođakánslera doaibmasuorgái gullevaš eará barggut dego barggut, mat laktásit dárkkistusaide ja riikkaidgaskasaš ovttasbargui. Vuoigatvuođakánsleradoaimmahat lea iehčanas doaimmahat, mii doaibmá stáhtaráđi oktavuođas.

Organisašuvdna

Vuoigatvuođakánsler jođiha vuoigatvuođakánsleradoaimmahaga. Kansliijahoavda jođiha doaimmahaga siskkáldas doaimma ja fuolaha dan produktivitehtas ja ovddideamis.

Vuoigatvuođakánsleradoaimmahagas lea stáhtaráđi áššiid ossodat, riektebearráigeahču ossodat ja hálddašanovttadat.

Stáhtaráđi áššiid ossodagas gieđahallojuvvojit

  • stáhtaráđi, ministeriijaid ja dásseválddi presideantta virgedoaimmaid bearráigeahčču
  • stáhtaráđđái ja ministeriijaide guoski guoddaleamit
  • ášševuoddjiid, almmolaš vuoigatvuođavehkiid ja lobi ožžon diggevehkiid bearráigeahčču
  • EU-áššiid álbmotlaš válmmaštallan.

Riektebearráigeahču ossodagas gieđahallojuvvojit

  • vuoigatvuođakánslerii dahkkon eará go ovddabealde máinnašuvvon guoddaleamit
  • duopmostuoluid bearráigeahčču ja eará lágalašvuođabearráigehččui guoski áššit, jus dat eai gula áššiide, mat gieđahallojuvvojit stáhtaráđi áššiid ossodagas
  • duopmáriidda ja áššáskuhttiide gustovaš virgeáššáskuhttináššit
  • ráŋggáštusduomuid dárkkisteapmái gustovaš áššit
  • badjelmearálaš nuppástusohcamii gustovaš áššit.

Hálddašanovttadat dikšu doaimmahaga siskkáldas hálddahussii, ekonomiijai ja bargovehkii gustovaš áššiid sihke doaimmahaga registrerenkantuvrra ja diehtojuohkima. Dasa lassin hálddašanovttadagas doaimmahuvvo vuoigatvuođakánslera jahkásaš muitalus riikkabeivviide ja stáhtaráđđái.

Guktot ossodagat ja hálddašanovttadat válmmaštallet lassin cealkámušáššiid ja gieđahallet riikkaidgaskasaš áššiid.