Teâđ veʹrǧǧkonttrest

Vuõiggâdvuõttkanslerkonttâr tuâjjan lij tuärjjeed vuõiggâdvuõttkansleeʹr da veäʹǩǩvuõiggâdvuõttkansleeʹr suännai toiʹmmjummšest. Vuõiggâdvuõttkanslerkonttrest valmštõõlât vuõiggâdvuõttkansleeʹr čåuʹddemnalla kuulli aaʹššid da hååidat jeeʹres vuõiggâdvuõttkansleeʹr tåimmsuârgga kuulli tuâjaid, mâʹte täʹrǩstummšid da meeraikõskksaž õhttsažtuõjju õhttneei tuâjaid. Lââʹssen vuõiggâdvuõttkanslerkonttâr tåimm iʹlmmteeisuõjjlummuž kõskkuum åålǥlaž iʹlmmtemkanaalân. Vuõiggâdvuõttkanslerkoontâr lij jiõččnaž veʹrǧǧkoontâr, kååʹtt tåimm riikksuåvtõõzz õhttvuõđâst.

Organisaatio

Vuõiggâdvuõttkansler jååʹđat vuõiggâdvuõttkanslerkonttâr. Kansliajååʹđteei jååʹđat veʹrǧǧkonttâr siiskâž toiʹmmjummuž di âânn huõl tõn puäđõõzzlažvuõđâst da ooudâsviikkmõõžžâst.

Vuõiggâdvuõttkanslerkonttrest lie riikksuåvtõsaaʹšši juâǥǥas, vuõiggâdvuõttvuåppâmjuâǥǥas da vaaldšemjuâǥǥas.

Riikksuåvtõsaaʹšši juâkksest ǩiõttʼtõõlât

  • riikksuåvtõõzz, ministeriai, ministeeʹri di tääʹssvääʹld presideeʹnt veʹrǧǧtååimai vuåppmõõžž
  • riikksuåvtõõzz, ministeriaid da ministeeʹri kuõskki kueʹdlmid
  • äʹššvuejjʼji, õõlmâs vuõiggâdvuõttvieʹǩǩteeʹji da lååʹv vuäǯǯam suudõõttâmvieʹǩǩteeʹji vuåppmõõžž
  • EU-aaʹšši meersaž valmštõõllâm.

Vuõiggâdvuõttvuåppâmjuâkksest ǩiõttʼtõõlât

  • vuõiggâdvuõttkansleera tuejjuum jeeʹres ko ooudpeäʹlnn peäggtum kueʹdlmid
  • suudišttmi vuåppmõõžž da jeeʹres lääǥǥlažvuõttvuåppmõõžž kuõskki aaʹššid, jõs tõk jie kuul aaʹššid, koid ǩiõttʼtõõlât riikksuåvtõsaaʹšši juâkksest
  • suʹvddjid da viârteeʹjid kuõskki veʹrǧǧviârtõsaaʹššid
  • raŋstemsuvddsi täʹrǩstummuž kuõskki aaʹššid
  • pâiʹlmeärrsaž muuttâsooccâm kuõskki aaʹššid.

Vaaldšemjuâǥǥas håidd veʹrǧǧkonttâr siiskâž vaaldâšm, tällõõzz da tuâjjlažkååʹdd kuõskki aaʹššid di veʹrǧǧkonttâr rekisterâʹsttemkoontârtååimaid da saaǥǥtummuž. Vaaldšemjuâǥǥas håidd še vuõiggâdvuõttkanslerkonttâr kõskkuum åålǥlaž iʹlmmtemkanaal kuõskki tuâjaid. Lââʹssen vaaldšemjuâkksest tååimtet vuõiggâdvuõttkansleeʹr juõʹǩǩ ekksaž mušttlõõzz eeʹttiǩ-kådda da riikksuåvtõʹsse.

Kuhttu juâkkaz da vaaldšemjuâǥǥas valmštâʹlle lââʹssen ciâlkâlmaaʹššid da ǩiõttʼtâʹlle meeraikõskksaž aaʹššid.