Maht kuoddâlem tahhoo?

Kuoddâlem tahhoo kirjálávt. Kuoddâlem puáhtá vuolgâttiđ poostâ peht čujottâsân Valtioneuvoston oikeuskansleri, PL 20, 00023 Valtioneuvosto tâi šleđgâpoostâ peht čujottâsân [email protected] Táválii šleđgâpoostâ peht ij koolgâ vuolgâttiđ kuoddâlmijd, maid kalga toollâđ syeligâsâst tâi main láá mudoi ärgiluánduliih tiäđuh. Jis kuoddâlem siskeeld tágárijd tiäđuid, te staatârääđi torvopoostâ puáhtá kevttiđ syeijejum šleđgâpoostâ vuolgâtmân.

Luuvâ lase torvopoostâ kevttimist (suomâkielân tâi ruotâkielân). 

Laavâ mield syeligâsâst toollâmnáál tâi ärgiluándulijd tiäđuid sistees tuállee viestâ vuolgâttem lii vuolgâtteijee ovdâsvástádâsâst (laahâ šleđgâlii ášástâlmist virgeomâhâštooimâst 8 §, 13/2003).

Kuoddâlem puáhtá meid persovnlávt kyeđđiđ staatârääđi jyehimkuávdážân čujottâsâst Ritarikatu 2 B, 00170 Helsig. Jyehimkuávdáš lii ávus vuossaargâst vástuppiäiván tme 8.00 – 16.15. Jyehimkuávdážân puáhtá tuš kyeđđiđ valmâš kuoddâlem tâi šleđgâlávt vuolgâttum kuoddâlem lahtosijd. Jyehimkuávdáást ij pyevti toohâđ kuoddâlem ige finniđ ravvim kuoddâlem toohâm várás tâi tiäđuid ton kieđâvušmist.

Riehtikanslervirgáduv kirjimkonttur váldá vuástá kuoddâlem já vuolgât kuoddâleijei tiäđu šleđgâlávt vuolgâttum kuoddâlem vuástáväldimist.

Kuoddâlemääših láá almoliih, jis toh iä ane sistees laavâ mield syeligâsâst toollâmnáál tiäđuid. Uási kuoddâlemčuávdusijn almostittoo riehtikanslervirgáduv nettisiijđoin nomâttemmin, kuás kuoddâleijee já táárbu mield kuoddâlem čuosâttuv ij pyevti innig tubdâđ čuávdusist.

Kuoddâlemääšist adelum čuávdusist ij pyevti väidiđ. Kuoddâlem kieđâvuššâm lii nuuvtá.

Maid kuoddâlem kalga anneeđ sistees?

Kuoddâlem kalga leđe tuárvi ohtâlistum, vâi tom puáhtá tutkâđ riehtikanslervirgáduvâst. Kuoddâlem västid koččâmuššáid: kii, maid, kuás já mondiet.

Kuoddâlmist kalga muštâliđ tärhibijd tiäđuid čuávvoo aašijn:

  • mon virgeomâháá, virgealmaa, almossiärváduv tâi eres almos tooimâ hoittájeijee pele monâttâlmist kuoddâlmist lii koččâmuš
  • mon laavâvuástásâžžân epidum monâttâlmân kuoddâlem kuáská
  • kuás monâttâllâm lii tábáhtum
  • monâttâllâm valdâlem já vuáđustâsah toos, mondiet kuoddâleijee ana, ete virgeomâhâš tâi virgealmai lii toimâm laavâvuástásávt.

Ovdil mainâšum aašijd kalga čäälliđ kuoddâlmân.

Kuoddâlmân lii pyeri lahteđ áášán kyeskee miärádâsâid, vástádâsâid já eres máhđulijd tehálijd äššikiirjijd, moh lohtâseh áášán. Tuše lahtosáid čujottem ij kuittâg lah tuárvi ohtâlistiđ kuoddâlem. Ovdâmerkkân lostâartikkâl vuolgâttem ij lah kuoddâlem. Tiätutorvosuujâi tiet lahtosijd ij pyevti vuolgâttiđ muštosäägist.

Kuoddâlmist kalga leđe kuoddâleijee nommâ já eres ohtâvuotâtiäđuh. Ohtâvuotâtiäđuh annojeh kuoddâlemvástádâs já máhđulij eres äššikiirjij vuolgâttem várás.

Kuoddâlem puáhtá toohâđ nube ulmuu peeleest. Talle kuoddâlem lahtosin lii pyeri lahteđ väldikirje.

Persovntiäđui kieđâvuššâm

Persovntiäđui kieđâvuššâm riehtikanslervirgáduvâst

Lasetiäđuh kuoddâlmist 

Lasetiäđuid kuoddâlmist já ton tohâmist tun kaavnah Távjá koijâdum koččâmušah –uásist.