Mo guoddaleapmi dahkko?
Guoddaleapmi dahkko girjjálaččat. Guoddaleami sáhttá sáddet poastta fáro čujuhussii Valtioneuvoston oikeuskansleri, PL 20, 00023 Valtioneuvosto dahje e-poasttain čujuhussii [email protected]. Dábálaš e-poasttain ii galgga sáddet suollemas dieđuid dahje guoddalemiid, mat sisttisdollet muđuid árggeslunddot dieđuid. Jus guoddaleapmi sisttisdoallá dákkár dieđuid, stáhtaráđi dorvopoastta sáhttá geavahit suddjejuvvon e-poastta sáddemii.
Loga lasi dorvopoastta geavaheami birra (suomagilli dahje ruoŧagillii).
Lága mielde dakkár sága sádden, mii sisttisdoallá suollemas dahje árggeslunddot dieđuid, lea sáddejeaddji ovddasvástádusas (láhka elektrovnnalaš áššiid dikšumis eiseváldedoaimmas 8 §, 13/2003).
Guoddaleami sáhttá maiddái persovnnalaččat guođđit stáhtaráđi juohkinguovddážii čujuhusas Ritarikatu 2 B, 00170 Helsinki. Juohkinguovddáš lea rabas vuossárggas bearjadahkii dii 8.00 – 16.15. Juohkinguovddážii sáhttá guođđit dušše gárvves guoddaleami dahje elektrovnnalaččat sáddejuvvon guoddaleami mildosiid. Juohkinguovddážis ii leat vejolaš dahkat guoddaleami iige oažžut rávvagiid guoddaleami dahkamii dahje dieđuid dan gieđahallama birra.
Vuoigatvuođakánsleradoaimmahaga registrerenkantuvra váldá guoddaleami vuostá ja sádde guoddaleaddjái dieđu elektrovnnalaččat sáddejuvvon guoddaleami vuostáiváldimis.
Guoddalanáššit leat almmolaččat, juos dat eai doala sisttiset dieđuid, maid galgá lága mielde doallat suollemassan. Oassi guoddalanmearrádusain almmustahttojit vuoigatvuođakánslera neahttasiidduin. Mearrádus nuppástuhttoalmmustahttima várás nu, ahte guoddaleaddji ja dárbbu mielde guoddaleami čuozáhaga ii sáhte šat dovdát mearrádusas.
Guoddaleapmái addojuvvon mearrádusa ii sáhte váidit. Guoddaleami gieđahallan lea nuvttá.
Maid guoddaleapmi galgá sisdoallat?
Guoddaleapmi galgá leat doarvái spesifiserejuvvon vai dan lea vejolaš dutkat vuoigatvuođakánsleradoaimmahagas. Guoddaleapmi vástida gažaldagaide: gii, maid, goas ja manne.
Guoddaleamis galgá muitalit dárkileappot čuovvovaš áššiid birra:
- man eiseválddi, virgeolbmo, almmusservoša dahje eará almmolaš doaimma dikšu meannudeamis guoddaleamis lea sáhka
- masa lágaheapmin eahpiduvvon meannudeapmái guoddaleapmi guoská
- goas meannudeapmi lea dáhpáhuvvan
- meannudeami govvádus ja ákkat dasa, manin guoddaleaddji geahččá eiseválddi dahje virgeolbmo doaibman lága vuostá.
Ovddabealde máinnašuvvon áššiid galgá čállit guoddaleapmái.
Guoddaleapmái lea buorre laktit áššái gustovaš mearrádusaid, vástádusaid ja eará vejolaš áššái laktáseaddji guovddáš áššegirjjiid. Dušše mildosiidda čujuheapmi ii goittotge reahkká spesifiseret guoddaleami. Ovdamearkan áviisaartihkkala sádden ii leat guoddaleapmi. Diehtodorvvolaš sivaid geažil mildosiid ii sáhte sáddet muitosákkiin.
Guoddaleamis galget gávdnot guoddaleaddji namma ja eará oktavuođadieđut. Oktavuođadieđut dárbbašuvvojit guoddalanvástádusa ja vejolaš eará áššegirjjiid sáddema várás.
Guoddaleami sáhttá bargat nuppi olbmo beales. Dákkár dilis guoddaleami mielddusin lea buorre laktit váldegirjji.
Persovdnadieđuid gieđahallan
Persovdnadieđuid gieđahallan vuoigatvuođakánsleradoaimmahagas
Lassedieđut guoddaleami birra
Lassedieđuid guoddaleami birra ja dan dahkamis gávnnat Dávjá jerrojuvvon gažaldagat -oasis.