Mäʹhtt kueʹddlââʹstet?

Kueʹddelm tuejjeet ǩeerjlânji. Kueʹddelm vueiʹtet vuõltteed pååʹšt mieʹldd addrõʹsse Valtioneuvoston oikeuskansleri, PL 20, 00023 Valtioneuvosto leʹbe neʹttpooʹštin addrõʹsse [email protected]. Takai neʹttpooʹštin ij õõlǥ vuõltteed peittast õnnum leʹbe muđoi äʹrǧǧluânddsaž teâđaid seʹst õõʹnni kueʹdlmid. Jõs kueʹddelm âânn seʹst näkam teâđaid, riikksuåvtõõzz staanpååʹšt vuäitt ââʹnned suejjuum neʹttpååʹšt vuõlttummša.

Looǥǥ lââʹzz staanpååʹšt ââʹnnmest (lääddas leʹbe ruõccâs). 

Vuõltteeʹjest lij lääʹjj mieʹldd vasttõs peittast õnnum leʹbe äʹrǧǧluânddsaž teâđaid seʹst õõʹnni saaǥǥ vuõlttummšest (lääʹǩǩ liâđǥlaž äʹššummšest veʹrǧǧneǩtoiʹmmjummšest 8 §, 13/2003).

Kueʹddelm vuäitt še persoonlânji kueʹđđed riikksuåvtõõzz jueʹǩǩemkõõskõʹsse addrõõzzâst Ritarikatu 2 B, 00170 Heʹlssen. Jueʹǩǩemkõõskõs lij äävai vuõssaarǥâst piâtnca čiâss 8.00–16.15. Jueʹǩǩemkõõskõʹsse vuäitt tåʹlǩ kueʹđđed vaalmâš kueʹddelm leʹbe liâđǥlânji vuõlttuum kueʹddelm meâlddõõzzid. Jueʹǩǩemkõõskõõzzâst ij leäkku vueiʹtlvaž tuejjeed kueʹddelm ij-ǥa vuäǯǯad vuäʹpstummuž kueʹddlâʹsttem diõtt leʹbe teâđaid tõn ǩiõttʼtõõllmest.

Vuõiggâdvuõttkanslerkonttâr rekisterâʹsttemkoontâr vuâsttaväldd kueʹddelm da vuõlttad kueʹddlõʹsttja teâđ liâđǥlânji vuõlttuum kueʹddelm vuâsttaväʹlddmest.

Kueʹddelmääʹšš lie õlmmâz, jõs tõk jie ââʹn seʹst lääʹjj mieʹldd peittast õnnum teâđaid. Vueʹzz kueʹddelmčåuddmõõžžin õlmstââʹttet vuõiggâdvuõttkansleeʹr neʹttseeidain. Čåuddmõõžž muuʹttet õlmstâʹttem vääras nuʹtt, što kueʹddlõʹstti da taarb mieʹldd kueʹddlõsttum toiʹmmjeei jeät vuåittu teänab tobddâd čåuddmõõžžâst.

Kueʹddelmääʹššest uvddum čåuddmõõžž ij vueiʹt läittad. Kueʹddelm ǩiõttʼtõõllâm lij määustem.

Mâid kueʹddelm âlgg ââʹnned seʹst?

Kueʹddelm âlgg leeʹd nokk jeärtõllum, što tõn vueiʹtet tuʹtǩǩeed vuõiggâdvuõttkanslerkonttrest. Kueʹddelm vaʹsttad kõõččmõõžžid: ǩii, mâid, kuäʹss da mõõn diõtt.

Kueʹdlmest âlgg mušttled tääʹrǩab teâđaid täin aaʹššin:

  • mõõn veʹrǧǧneeʹǩǩ, veʹrǧǧoummu, õõlmâsõutstõõzz leʹbe jeeʹres õõlmâs tuâj hoiʹddjeei mõõntõõllmõõžžâst kueʹdlmest lij kõõččmõš
  • mõõn lääʹjjvuâsttsiʹžžen eppõllum mõõntõõllmõõžž kueʹddelm kuâskk
  • kuäʹss mõõntõõllmõš lij šõddâm
  • mõõntõõllmõõžž kovvõs da vuâđđtõõllmõš tõõzz, mõõn diõtt kueʹddlõʹstti ǩeäčč, što veʹrǧǧneǩ leʹbe veʹrǧǧooumaž lij tåimmam lääʹjj vuâstta.

Ooudpeäʹlnn peäggtum aaʹššid âlgg ǩeeʹrjted kueʹdlma.

Kueʹdlma lij šiõǥǥ õhtteed ääʹšš kuõskki tuʹmmstõõǥǥid, vasttõõzzid da jeeʹres vueiʹtlvaž äšša õhttneei kõskksaž äʹššǩiiʹrjid. Tåʹlǩ meâlddõõzzid viiʹttjummuš ij kuuitâǥ riʹjtte jeärtõõllâd kueʹddelm. Ouddmiârkkân gaʹzeâʹtartikkeeʹl vuõlttummuš ij leäkku kueʹddelm. Teâttstaanmääinai diõtt meâlddõõzzid ij vueiʹt vuõltteed mošttsääʹǧǧ âʹlnn.

Kueʹdlmest âʹlǧǧe leeʹd kueʹddlõʹstti nõmm da jeeʹres õhttvuõtt-teâđ. Õhttvuõtt-teâđaid taarbšet kueʹddelmvasttõõzz da vueiʹtlvaž jeeʹres äʹššǩiiʹrji vuõlttummuž vääras.

Nuuʹbb oummu peäʹlest vuäitt kueʹddlâʹstted. Teʹl kueʹddelm meâlddõssân lij šiõǥǥ õhtteed väʹlddǩeeʹrj.

Persoonteâđai ǩiõttʼtõõllâm

Persoonteâđai ǩiõttʼtõõllâm vuõiggâdvuõttkanslerkonttrest

Lââʹssteâđ kueʹdlmest 

Lââʹssteâđaid kueʹdlmest da kueʹddlâsttmõõžžâst kaaunak Täujja kõččum kõõččmõõžž -vueʹzzest.