Mäʹhtt iʹlmmtõõzz tuejjeet?

Iʹlmmtõõzz vueiʹtlvaž puästtadâânnmõõžžâst vuäitt tuejjeed vuõiggâdvuõttkanslerkonttâr kõskkuum åålǥlaž iʹlmmtemkanaaʹle ǩeerjlânji leʹbe njäälmlânji. 

Ouddâl iʹlmmtõõzz tuejjummuž lij šiõǥǥ tobdstõõttâd iʹlmmteei suõjjlummuž takai oudldõõzzid:

  • Iʹlmmteeʹjest lij iʹlmmtempoodd vuâđđtõllum mäinn åskkad, što koon-ne vuâstta veäʹr tuejjummuž kuõskki teâtt tuõʹllai.
  • Koon-ne vuâstta veäʹr tuejjummuž kuõskki teâtt kooll iʹlmmteeisuõjjlemlääʹjj suåvldemvoudda. Tobdstõõđ suåvldemvoudda.
  • Iʹlmmteei iʹlmmat tuâjas õhttvuõđâst hoʹhssjum puästtadâânnmõõžžâst.

Puäst-teâđai iʹlmmtummšest jääutai raŋstet, da tõʹst vuäitt seuʹrrjed pååʹmehkoʹrvveemõõlǥtemvuõtt.

Looǥǥ lââʹzz iʹlmmteeisuõjjlummšest.

Iʹlmmtõõzzâst âlgg leeʹd iʹlmmteei nõmm. Vuõiggâdvuõttkanslerkoontâr ij vääʹld vuâstta nõõmteʹmes iʹlmmtõõzzid.

Iʹlmmtõs âlgg ââʹnned seʹst 

  • iʹlmmteei nõõm da õhttvuõtt-teâđ, mâʹte neʹttpååʹštaddrõõzz, teʹlfon-nââmar leʹbe addrõsteâđaid
  • teâđ tõʹst, mõõn toiʹmmjeei da puästtadâânnmõõžž iʹlmmtõs kuâskk
  • tääʹrǩab čiõʹlǧǧõõzz puästtadâânnmõõžžâst
  • teâđ tõʹst, måkam sââʹjest iʹlmmteei lij iʹlmmtõõzz vuâlla šõddâm toiʹmmjeeja.

Iʹlmmtõõzzâst âlgg mušttled, haaʹlad-a iʹlmmteei vuõiggâdvuõttkanslerkonttrest teâđ iʹlmmtõõzz vuâsttaväʹlddmest. Vuâsttaväʹlddemiʹlmmtõõzz jeät tååimtuku iʹlmmteei raukkmest leʹbe jõs tõn tååimtummuš vaareʹči iʹlmmteei identiteeʹtt sueʹj. Teʹl jeät še tååimtuku iʹlmmteeja teâđ tõʹst, koon veʹrǧǧnekka iʹlmmtõs lij sirddum. Vuõiggâdvuõttkanslerkoontâr tååimat iʹlmmteeja vuâsttaväʹlddemiʹlmmtõõzz mââimõsân čiččâm peeiʹv seʹst iʹlmmtõõzz vuâsttaväʹlddmest.

Iʹlmmtõõzz tuejjummša lie mäŋgg nääʹlled:

  • neʹttpååʹšt leʹbe pååʹšt
  • njäälmlaž iʹlmmtõs.

Iʹlmmtõõzz vuõlttummuš neʹttpooʹštin leʹbe pååʹšt mieʹldd

Iʹlmmtõõzz vuäitt vuõltteed neʹttpooʹštin addrõʹsse [email protected] leʹbe pååʹšt mieʹldd addrõʹsse Valtioneuvoston oikeuskansleri, PL 20, 00023 Valtioneuvosto. 

Neʹttpååʹštriâžldõk ij pââʹst vuâsttaväʹldded čuuʹt jõnn meâlddõsteâttõõzzid. Õõut neʹttpååʹšt meâlddõõzzi õʹhttelaʹsǩǩuum šuurmõs šorradvuõtt lij 10 Mt. 

Takai neʹttpooʹštin ij õõlǥ vuõltteed peittast õnnum leʹbe muđoi äʹrǧǧluânddsaž teâđaid seʹst õõʹnni iʹlmmtõõzzid. Suejjuum neʹttpååʹšt vuõlttummša vuäitt ââʹnned riikksuåvtõõzz staanpååʹšt.

Vuõltteeʹjest lij lääʹjj mieʹldd vasttõs peittast õnnum leʹbe äʹrǧǧluânddsaž teâđaid seʹst õõʹnni saaǥǥ vuõlttummšest (lääʹǩǩ liâđǥlaž äʹššummšest veʹrǧǧneǩtoiʹmmjummšest 8 §, 13/2003).

Njäälmlaž iʹlmmtõõzz tuejjummuš teʹlfoonin leʹbe persoonlaž kaaunõõttmõõžžâst

Njäälmlaž iʹlmmtõõzz vuäitt tuejjeed teʹlfoonin. Iʹlmmtõõzz tuejjeet nââmra 02951 62600. Nââmrest vääʹldet iʹlmmtõõzzid vuâstta mââibaarǥi čiâss 14-15 da neljdpeeiʹvi čiâss 10-11.

Teʹl, jõs jeäʹrben raaukât, lij vueiʹtlvaž jäʹrjsted persoonlaž kaaunõõttmõõžž iʹlmmtõõzz tuejjeem diõtt. Kaaunõõttmõõžž jäʹrjstet vuõiggâdvuõttkanslerkonttâr tåimmpääiʹǩest (Riikksuåvtõõzz lâʹnn, Snellmaninkatu 1 A, Heʹlssen). Kaaunõõttmõõžžâst tuejjeet påʹrddǩeeʹrj. Iʹlmmteeʹjest lij vueiʹttemvuõtt täʹrǩsted da priimmâd påʹrddǩeeʹrj. Persoonlaž kaaunõõttmõõžž vuäitt suåppâd neʹttpooʹštin [email protected] leʹbe soiʹttjeeʹl 02951 62600.

Persoonteâđai ǩiõttʼtõõllâm

Persoonteâđai ǩiõttʼtõõllâm vuõiggâdvuõttkanslerkonttrest