Áššebáhpáriid almmolašvuođa govvádus
Dát vuoigatvuođakánsleradoaimmahaga áššebáhpáriid almmolašvuođa govvádus lea čállojuvvon almmolaš hálddahusa diehtohálddašeamis addojuvvon lága (906/2019) 28 §:a mielde áššebáhpáriid almmolašvuođa ja almmolašvuođaprinsihpa ollašuhttima várás. Govvádusa ulbmilin lea addit almmolašgova das, makkár diehtomateriálat ja áššeregistarat virgebáikkis leat, ja mo virgebáikki diehtohálddašeapmi lea ordnašuvvan, ja mo dieđuid ja áššegirjjiid, mat gullet virgebáikki diehtomateriálaide, sáhttá oažžut atnui.
Áššebáhpáriid almmolašvuođa govvádusain ollašuhtto almmolašvuođaprinsihppa ja almmolaš hálddahusa rabasvuohta sihke ovddiduvvo almmolaš dieđuid ja áššebáhpáriid olahahttivuohta. Govvádusain geahččaluvvo álkidahttit diehtobivdagiid spesifiseren ja bivdagiid dahkan vuoigatvuođakánsleradoaimmahahkii.
Vuoigatvuođakánsleradoaimmahaga áššehálddašanvuogádat sisdoallá áššemeannudeami govvideaddji metadieđuid johtui biddjojuvvon áššiin ja johtui biddjiin (namma ja oktavuođadieđut) sihke áššiid gieđahallanmuttuin ja mearrádusain ja daidda laktáseaddji áššebáhpáriid birra. Vuoigatvuođakánsleradoaimmahat válddii atnui ođđa áššehálddašanvuogádaga 18.5.2020, goas virgebáiki sirdásii ollásit elektrovnnalaš áššemeannudeapmái. Áššehálddašanvuogádat gohčoduvvo OKV-Vahva:n ja dat gullá seamma ollisvuhtii ministeriijaid ja dásseválddi presideantta kansliija Vahva-áššehálddašanvuogádagain. OKV-Vahva doaibmá goittotge sierra dáid vuogádagain.
Áššehálddašanvuogádat sisdoallá virgebáikki siskkáldas doaimma (hálddahus-, ekonomiija- ja bargiidáššit) sihke lágalašvuođabearráigeahču doibmii guoski áššiid. Vuogádat hápmašuvvá čuovvovaš oaiveluohkáid mielde ordnašuvvan áššejoavkkuin, mat čuvvot virgebáikki diehtostivrenplána:
- hálddahusáššit
- guoddalanáššit
- stáhtaráđi bearráigeahčču
- duopmostuoluid bearráigeahčču
- áššáskuhttiid bearráigeahčču
- ášševuoddjiid bearráigeahčču
- lohpejuristtaid bearráigeahčču
- iešráđálaš bearráigeahčču
- eiseválddiid almmuhusat.
Áššehálddašanvuogádagas sáhttá ohcat ovdamearkan ášši johtui biddji namain, ášši čuozáhagain, mearrádustiippain, bargoluohkáin ja ášši mearrebeivviin.
Vuoigatvuođakánsleradoaimmahaga diehtomateriálat eai juhkkojuvvo áššehálddahusas rahpasit vuogádagaid gaskka.
Virgebáikki áššehálddašanvuogádaga lassin virgebáikkis leat bargiidáššiid ja ekonomiijaáššiid diehtomateriálat (stáhta hálddahusa oktasaš Kieku-vuogádat, man doallá Stáhta ekonomiija- ja bargiidhálddahusa bálvalanguovddáš, Palkeet). Ohcamušat, mat laktásit virggiid deavdimiidda, gieđahallojuvvojit Valtiolle.fi -bálvalusas, man doallá Palkeet. Vuoigatvuođakánsleradoaimmahat vástida diehtobivdagiidda, mat gusket dáin diehtovuogádagain gieđahallon virgebáikki diehtomateriálaide.
Diehto- ja áššebáberbivdagat sáddejuvvojit vuoigatvuođakánsleradoaimmahaga registrerenkantuvrii vuosttamužžan e-poasttain ([email protected]). Registrerenkantuvrra eará oktavuođadieđut leat: telefovdna 02951 62902 ja poastačujuhus Oikeuskanslerinvirasto, PL 20, 00023 VALTIONEUVOSTO. Diehtobivdaga sáhttá čujuhit vuoigatvuođakánsleradoaimmahahkii ja guođđit stáhtaráđi juohkinguovddážii čujuhussii Ritarikatu 2B, Helsinki (rabas dii 8 – 16.15).
Áššiid, mat leat jođus, áššebáhpáriid almmolašvuhtii guoski áššiid čoavdá virgebáikkis dat, guhte lea čoavdimin ášši (vuoigatvuođakánsler, veahkkevuoigatvuođakánsler dahje veahkkevuoigatvuođakánslera sadjásaš). Čovdojuvvon áššiid buohta áššebáberalmmolašvuođas mearrida vuoigatvuođakánsleradoaimmahaga kansliijahoavda.
Áššebáberkopiijain ja prentehusain sáhttit bearrat mávssu nu mo eiseválddiid doaimma almmolašvuođas addojuvvon lága (621/1999) 34 §:s mearriduvvo ja stáhtaráđi vuoigatvuođakánslera mearrádusas vuoigatvuođakánsleradoaimmahaga bálvalusaid mávssuvulošvuođa (17.11.2005) birra mearriduvvo. Virgebáikki ulbmilin lea ođasmahttit máksomearrádusa fargga báliid.
Vuoigatvuođakánslera lágalašvuođabearráigeahču čoavdingeavadis almmustahttojuvvojit mearrádusat vuoigatvuođakánsleradoaimmahaga neahttasiidduin suomagillii ja ruoŧagillii (www.oikeuskansleri.fi) sihke Finlex-almmustahttinvuogádagas Valtioneuvoston oikeuskansleri -diehtovuođus suomagillii ja ruoŧagillii (www.finlex.fi/fi/viranomaiset/foka).